Hamein Barbaadiyon Pe Muskurana Khub Aata Hai

Chandni Pandey

hamen barbadiyon pe muskurana khuub aata hai

andheri raat men dipak jalana khuub aata hai

ghalat-fahmi tumhen kuchh aur aata ho na aata ho

achanak aag paani men lagana khuub aata hai

zara si baat pe divar khinchvane laga hai vo

use bhi raai ka parbat banana khuub aata hai

tire har jhuth ko sach maan lete hain hamesha ham

hamen bhi rasm-e-ulfat ko nibhana khuub aata hai

kisi ke samne sar ko jhukate ham nahin lekin

khuda ke samne sar ko jhukana khuub aata hai

tumhare gham ne hi bakhshi hai ham ko ye hunar-mandi

hamen ashko ko ab moti banana khuub aata hai