Aks Jal Jaenge Aaine Bikhar Jaenge

aks jal jā.eñge ā.īne bikhar jā.eñge

ḳhvāb in jāgtī āñkhoñ meñ hī mar jā.eñge

ham ki dil-dāda kahāñ raunaq-e-bāzār ke haiñ

be-niyāzāna hī duniyā se guzar jā.eñge

jin ko dastār kī ḳhvāhish hai unheñ kyā ma.alūm

ma.arka ab ke vo Thahrā hai ki sar jā.eñge

koī manzil nahīñ raste haiñ faqat chāroñ taraf

jo nikal aa.e haiñ ghar se vo kidhar jā.eñge

dekh aa kar ki tire hijr meñ bhī zinda haiñ

tujh se bichhḌe the to lagtā thā ki mar jā.eñge

ham ki sharminda-e-asbāb nahīñ hone ke

hukm jab hogā to be-raḳht-e-safar jā.eñge

ham se dariyā jo gurezāñ hai to ham bhī ik din

kisī tapte hue sahrā meñ utar jā.eñge

ham ko dariyā se na maujoñ se na kashtī se ġharaz

ab ke us paar hameñ le ke bhañvar jā.eñge

Leave a Comment