aks jal ja.enge a.ine bikhar ja.enge
ḳhvab in jagti ankhon men hi mar ja.enge
ham ki dil-dada kahan raunaq-e-bazar ke hain
be-niyazana hi duniya se guzar ja.enge
jin ko dastar ki ḳhvahish hai unhen kya ma.alum
ma.arka ab ke vo Thahra hai ki sar ja.enge
koi manzil nahin raste hain faqat charon taraf
jo nikal aa.e hain ghar se vo kidhar ja.enge
dekh aa kar ki tire hijr men bhi zinda hain
tujh se bichhḌe the to lagta tha ki mar ja.enge
ham ki sharminda-e-asbab nahin hone ke
hukm jab hoga to be-raḳht-e-safar ja.enge
ham se dariya jo gurezan hai to ham bhi ik din
kisi tapte hue sahra men utar ja.enge
ham ko dariya se na maujon se na kashti se gharaz
ab ke us paar hamen le ke bhanvar ja.enge
Leave a Reply