ḳhvab kya hain sharab ki jhilen
niind aa.e to ham zara pi len
ek suraj hazar-ha kirnen
khul ga.i hain hayat ki rilen
tez maghrib ki ho ga.i hai hava
thartharane lagi hain qindilen
shahr ki gard hi lipaT jaa.e
koi apna mile to ham ji len
fart-e-gham se chaTaḳh ga.e alfaz
kaise niklengi ruuh se kilen
ye bhi ghar ho gaya hai nazr-e-fasad
is men rahti thiin kuchh ababilen
baat apni banegi kya ‘asrar’
zehn men rah ga.i hain tavilen
Leave a Reply