jab koi bhi ḳhaqan sar-e-bam na hoga
phir ahl-e-zamin par koi ilzam na hoga
kal vo hamen pahchan na paa.e sar-e-rahe
shayad unhen ab ham se koi kaam na hoga
phir kaun samajh pa.ega asrar-e-haqiqat
jab faisla koi bhi sar-e-am na hoga
ye ahd-e-ravan ḳhak-nishan dhyan men rakkho
phir DhunDoge kis ko jo koi naam na hoga
banne ko hai ik roz parindon ka muqaddar
utrenge to ham-rang-e-zamin daam na hoga
mahfil men agar zikr ho arbab-e-vafa ka
aisa nahin ‘rahat’ ki tira naam na hoga
Leave a Reply