kuchh bhi tha sach ke taraf-dar hua karte the
tum kabhi sahab-e-kirdar hua karte the
sunte hain aisa zamana bhi yahan guzra hai
haq unhen milta jo haqdar hua karte the
tujh ko bhi zoam sa rahta tha masihai ka
aur ham bhi tire bimar hua karte the
ik nazar roz kahin jaal bichhae rakhti
aur ham roz giraftar hua karte the
ham ko maalum tha aana to nahin tujh ko magar
tere aane ke to asar hua karte the
ishq karte the faqat pas-e-vafa rakhne ko
log sach-much ke vafadar hua karte the
aina khud bhi sanvarta tha hamari khatir
ham tire vaste tayyar hua karte the
ham gul-e-khvab sajate the dukan-e-dil men
aur phir khud hi kharidar hua karte the
kucha-e-‘mir’ ki janib nikal aate the sabhi
vo jo ‘ghalib’ ke taraf-dar hua karte the
jin se avargi-e-shab ka bharam tha vo log
is bhare shahr men do-char hua karte the
ye jo zindan men tumhen saae nazar aate hain
ye kabhi raunaq-e-darbar hua karte the
main sar-e-dasht-e-vafa ab huun akela varna
mere ham-rah mire yaar hua karte the
vaqt ruk ruk ke jinhen dekhta rahta hai ‘salim’
ye kabhi vaqt ki raftar hua karte the
Leave a Reply