jo mo’tarif the mire shajra-e-nasab ke sab
vo log ho ga.e ruḳhsat yahan se kab ke sab
faza-e-nisbat-o-qurbat hai gard gard magar
samajh rahe hain mire dil ka haal sab ke sab
vo log jin ki himayat men ḳhud se laḌta raha
vo log ho ga.e mere ḳhilaf ab ke sab
ravish men auron ke aslaf ki ravish na rahi
so qisse likkhe ga.e mere hi nasab ke sab
main dusron ki talab men bahal hota raha
ghulam hote rahe apni hi talab ke sab
vo harf jis se uTha hai miri nava ka ḳhamir
hain muntazir usi ik harf-e-zer-e-lab ke sab
use ḳhabar thi ki main ek shab ka mehman huun
sau band va kiye us ne qaba-e-shab ke sab
kisi riha.i ka ahval janne ke liye
sirhane baiThe hain ḳhamosh jan-ba-lab ke sab
charagh aur qalam aankh aur hairani
ye isti.are hain goya miri talab ke sab
ye ranjishen hain ‘razi’ aur hi ta.alluq se
ye silsile hain kisi aur hi tarab ke sab
Leave a Reply