Gale Lagaen Karen Pyar Tumko Id Ke Din

gale lagaen karen pyaar tum ko iid ke din

idhar to aao mire gul-ezar iid ke din

ghazab ka husn hai araishen qayamat ki

ayaan hai qudrat-e-parvardigar iid ke din

sambhal saki na tabiat kisi tarah meri

raha na dil pe mujhe ikhtiyar iid ke din

vo saal bhar se kudurat bhari jo thi dil men

vo duur ho gai bas ek baar iid ke din

laga liya unhen siine se josh-e-ulfat men

gharaz ki aa hi gaya mujh ko pyaar iid ke din

kahin hai naghma-e-bulbul kahin hai khanda-e-gul

ayaan hai josh-e-shabab-e-bahar iid ke din

sivayyan duudh shakar meva sab muhayya hai

magar ye sab hai mujhe nagavar iid ke din

mile agar lab-e-shirin ka tere ik bosa

to lutf ho mujhe albatta yaar iid ke din

Leave a Comment