Aqeel Nomani
ab dil ko intizar tire faisle ka hai
aur tujh men aib der talak sochne ka hai
koi nahin sunega bura.i sharab ki
har shaḳhs is dayar men aadi nashe ka hai
ab sang-bariyon ka amal sard paḌ gaya
ab us taraf bhi ranj mire TuTne ka hai
ye saare log ḳhud to hain jaise koi kaman
jo tiir chal raha hai kisi dusre ka hai
chehre ka ḳhol saaf nazar aa gaya ‘aqil’
phir bhi ye shor hai ki qusur a.ine ka hai
Leave a Reply