na malal-e-hijr na muntazir hain hava-e-sham-e-visal ke
ham asiir apni hi zaat ke kisi ḳhvab ke na ḳhayal ke
mire shauq-e-sair-o-safar ko ab na.e ik jahan ki numud kar
tire bahr o bar ko to rakh diya hai kabhi ka main ne khangal ke
vo hamin the jin ke kamal ki hai ye ka.enat bhi mo’tarif
vahi ham ki aaj tamash-bin hue ḳhud hi apne zaval ke
jo navah-e-jan men muqim hain unhin mausamon ka tilism hai
kabhi jaam uchhale nashat ke kabhi rang uḌaa.e malal ke
vahi sub.h o shaam ke marhale vahi ḳhaal o aab ke silsile
vahi qisse nan-o-namak ke hain vahi jhagḌe mal-o-manal ke
tira a.ina huun main zindagi tire aks ka main amiin huun
hai miri shikast tira ziyan mujhe rakh bacha ke sambhal ke
mire kar-zar-e-hayat men na koi najib na kam-nasab
yahan naam sirf hunar ka hai yahan charche bas hain kamal ke
nahin gardishon men jo vaqt ki ho ata vo sa.at-e-mavara
na to ibtida ho na intiha na hon silsile mah o saal ke
Leave a Reply