dil men vafa ki hai talab lab pe saval bhi nahin
ham hain hisar-e-dard men us ko ḳhayal bhi nahin
vo jo ana parast hai main bhi vafa parast huun
us ki misal bhi nahin meri misal bhi nahin
ahd-e-visal-e-yar ki tujh men nihan hain dhaḌkanen
mauja-e-ḳhun-e-ehtiyat ḳhud ko uchhal bhi nahin
tum ko zaban de chuke dil ka jahan de chuke
ahd-e-vafa ko toḌ den apni majal bhi nahin
us se kaho ki do ghaḌi ham se vo aa mile kabhi
maana ye hai muhal par itna muhal bhi nahin
Leave a Reply