dhuup nikli din suhane ho gae
chand ke sab rang phike ho gae
kya tamasha hai ki be-ayyam-e-gul
tahniyon ke haath piile ho gae
is qadar roya huun teri yaad men
aine ankhon ke dhundle ho gae
ham bhala chup rahne vaale the kahin
haan magar halat aise ho gae
ab to khush ho jaaen arbab-e-havas
jaise vo the ham bhi vaise ho gae
husn ab hangama-ara ho to ho
ishq ke daave to jhute ho gae
ai sukut-e-sham-e-gham ye kya hua
kya vo sab bimar achchhe ho gae
dil ko tere gham ne phir avaz di
kab ke bichhde phir ikatthe ho gae
aao ‘nasir’ ham bhi apne ghar chalen
band is ghar ke dariche ho gae
Leave a Reply