Naseer Ahmad Nasir
shab ki pahna.iyon men chiḳh uThe
dard tanha.iyon men chiḳh uThe
tah-ba-tah munjamid thakan jaagi
jism angḌa.iyon men chiḳh uThe
dhuup jab a.ina-ba-dast aa.i
aks bina.iyon men chiḳh uThe
main samundar huun koi tu siipi
meri gahra.iyon men chiḳh uThe
ratjage tan ga.e darichon par
ḳhvab angna.iyon men chiḳh uThe
jab pahaḌon pe barf girne lage
koi utra.iyon men chiḳh uThe
jab pukara kisi musafir ne
raste kha.iyon men chiḳh uThe
kuchh ḳhamoshi se dekhte the mujhe
kuchh tamasha.iyon men chiḳh uThe
raat bhar ḳhvab dekhne vaale
din ki sachcha.iyon men chiḳh uThe
Leave a Reply