Sajjad Baqar Rizvi
lafz jab koi na haath aaya ma.ani ke liye
kya maze ham ne zaban-e-be-zabani ke liye
ye do-raha hai chalo tum rang-o-bu ki khoj men
ham chale sahra-e-dil ki baghbani ke liye
zindagi apni thi goya lamha-e-furqat ka tuul
kuchh maze ham ne bhi umr-e-javedani ke liye
main bhala ThanDi hava se kya ulajhta chup raha
phuul ki ḳhush-bu bahut thi sargirani ke liye
TuuT paḌti thiin ghaTa.en jin ki ankhen dekh kar
vo bhari barsat men tarse hain paani ke liye
raakh armanon ki giili lakḌiyan ehsas ki
ham ko ye saman mile sho.ala-bayani ke liye
sham.a ho fanus se bahar to gul ho ja.egi
bandish-e-alfaz mat toḌo ma.ani ke liye
do kinare hon to sail-e-znidagi dariya bane
ek had lazim hai paani ki ravani ke liye
aaj kyuun chup chup ho ‘baqar’ tum kabhi mash.hur the
doston yaron men apni ḳhush-bayani ke liye
Leave a Reply