Kafeel Aazar Amrohvi
ghaTaon ki udasi pi raha huun
main ik gahra samundar ban gaya huun
tiri yadon ke angaron ko aksar
tasavvur ke labon se chumta huun
koi pahchanne vaala nahin hai
bhare bazar men tanha khaḌa huun
mira qad kitna uncha ho gaya hai
falak ki vus.aton ko napta huun
vo yuun mujh ko bhulana chahte hain
ki jaise main bhi koi hadisa huun
badalte mausamon ki Diary se
tire baare men aksar puchhta huun
mire kamre men yaden so rahi hain
main saḌkon par bhaTakta phir raha huun
ubharte Dubte suraj ka manzar
bason ki khiḌkiyon se dekhta huun
kisi ki yaad ke patton ko ‘azar’
havaon se bacha kar rakh raha huun
Leave a Reply