Ejaz Rahmani
hansi labon pe saja.e udaas rahta hai
ye kaun hai jo mire ghar ke paas rahta hai
ye aur baat ki milta nahin koi us se
magar vo shaḳhs sarapa sipas rahta hai
jahan pe Duub gaya meri aas ka suraj
usi jagah vo sitara-shanas rahta hai
guzar raha huun main sauda-garon ki basti se
badan pe dekhiye kab tak libas rahta hai
likhi hai kis ne ye tahrir reg-e-sahil par
bahut dinon se samundar udaas rahta hai
main vahshaton ke safar men bhi huun kahan tanha
yahi guman hai koi as-pas rahta hai
main guftugu ke har andaz ko samajhta huun
ki meri zaat men lahja-shanas rahta hai
vo faslon men bhi rakhta hai rang qurbat ke
nazar se duur sahi dil ke paas rahta hai
jab un se guftugu karta hai koi bhi ‘ejaz’
ik iltimas pas-e-iltimas rahta hai
Leave a Reply