Aurang Zeb
ḳhush bahut aate hain mujh ko raste dushvar se
sar-phira huun main nahin Darta kisi divar se
manzilon ko pal men pichhe chhoḌta jaata huun main
raste bhi ḳhauf khate hain miri raftar se
ḳhamushi se suraten miT ja.engi manzar se kya
kuchh nahin kahna kisi ko a.ina-bardar se
ḳhushk ankhon se main takta huun kinare ki taraf
mujh ko sairabi bulati hai samundar paar se
kya mira ghar bhi nahin haq men ki main tanha rahun
itni vahshat ho rahi hai kyuun dar-o-divar se
asmanon par paḌav Dalna to hai mujhe
guftugu hoti rahegi sabit-o-sayyar se
tum bhi ab kuchh aur socho is mohabbat ke siva
main bhi ab ukta gaya huun ek hi azar se
main sharifon se sharafat men bhi aage hi raha
main ne chalaki bhi sikhi paa.e ke ayyar se
rat-bhar is shahr men vo sanehe hote hain ‘zeb’
dil dahal uThta hai mera sub.h ke aḳhbar se
Leave a Reply