abdul-hamid-adam

Muskura Kar Khitab Karte Ho

muskura kar khitab karte ho

adaten kyuun kharab karte ho

maar do mujh ko rahm-dil ho kar

kya ye kar-e-savab karte ho

muflisi aur kis ko kahte hain!

daulaton ka hisab karte ho

sirf ik iltija hai chhoti si

kya use baryab karte ho

ham to tum ko pasand kar baithe

tum kise intikhab karte ho

khaar ki nok ko lahu de kar

intizar-e-gulab karte ho

ye nai ehtiyat dekhi hai

aaine se hijab karte ho

kya zarurat hai bahs karne ki

kyuun kaleja kabab karte ho

ho chuka jo hisab hona tha

aur ab kya hisab karte ho

ek din ai ‘adam’ na pi to kya

roz shaghl-e-sharab karte ho

kitne be-rahm ho ‘adam’ tum bhi

zikr-e-ahd-e-shabab karte ho

ho kisi ki khushi gar is men ‘adam’

jurm ka irtikab karte ho

More Poems

Leave a Comment