taan tanz avaze sun rahe ho ab bolo
bolne ke khamiyaze sun rahe ho ab bolo
baat bas zara si thi baat hi to ki tum se
shahr bhar ke avaze sun rahe ho ab bolo
sar-phiri havaon men ghar se kyuun nikal aae
baj rahe hain darvaze sun rahe ho ab bolo
jis ke ji men jo aae mashvare to dega na
mashvare nae taaze sun rahe ho ab bolo
dil ke is taalluq men ab badan kahan jaae
khvahishon ke avaze sun rahe ho ab bolo
qufl koi khanka hai saaz hain kivadon ke
baj rahe hain darvaze sun rahe ho ab bolo
dil ke ik dhadakne ki itni saari tavilen
sab ghalat hain andaze sun rahe ho ab bolo
Leave a Reply