Poet
miTTi ka rang-rup bana.e hue hain log
lekin dilon men sang chhupa.e hue hain log
ai abr-e-haq-pasand zara jhuum kar baras
chehre pe jhuTi shaan jama.e hue hain log
chehre pe doston ke riya nachti mili
chahat ki kaisi dhuup ugaa.e hue hain log
is baar kaun daam men aa jaa.e kya ḳhabar
ma.asumiyat ka jaal bichha.e hue hain log
shayad vajud apna salamat na rah sake
sho.ala-numa mizaj bana.e hue hain log
daman-e-ishtiyaq ka bachna muhal hai
‘aḳhtar’ havas ki aag jala.e hue hain log
Leave a Reply