din ka raaja hota hai aur raat ki raani hoti hai
har ḳhushbu ki apni apni ek kahani hoti hai
pahle ik ik ḳhvab se ham ta.amir tamanna karte hain
phir dil men ta.abir ki ḳhud hi ḳhaak uḌaa.i hoti hai
pahla shagufa hairat ka duniya ko dekh ke phuTa tha
us ke baad to jivan bhar ḳhud par hairani hoti hai
raat amavas ki hai sar par aur sannaTa duur tilak
dil dariya men sochti huun kaise tughyani hoti hai
yadon ke virane se kuchh raushni hasil karte hain
un ankhon ki dil men jab tasvir banani hoti hai
abr-e-naisan jab barsa aghosh sadaf ne phaila.i
pahla qatra barish ka to pahli nishani hoti hai
Leave a Reply