badan ko chhu len tire aur surḳh-ru ho len
bikharna hi hai to ham kyuun na mushkbu ho len
chalen hain ishq ki karne agar ibadat ham
baha ke ashk zara pahle ba-vazu ho len
chhupa ke ḳhvabon ḳhayalon ko dil ke goshe men
zara si der haqiqat se ru-ba-ru ho len
baras ga.e to bhala aab ke siva kya hain
un ansuon ki hai qimat ki jo lahu ho len
kitab-e-dil ko varaq-dar-varaq dikha denge
zara ham aap se tum aur tum se tu ho len
na mujh men main hi rahun aur na tujh men tu hi rahe
milen kuchh aise ki donon hi hu-ba-hu ho len
safar vafa ka adhura adhura hai jaan lo ‘nayab’
ki jab talak na dil-o-jan lahu lahu ho len
Leave a Reply