miri bala se zamana ḳhilaf ho jaa.e
main chahta huun tira zehn saaf ho jaa.e
ye abr-para nahin dost ashk-e-girya hai
ye pattharon pe gire to shigaf ho jaa.e
agar hai shauq baḌon se mukalme ka tujhe
durust pahle tira shiin qaaf ho jaa.e
rahe ḳhayal ki aa.e na ehtiram men farq
agar kisi se tira iḳhtilaf ho jaa.e
charagh ham ne mohabbat ke kar diye raushan
hava ka ḳhauf kise hai ḳhilaf ho jaa.e
ab is tarah jo mujhe rad karoge mumkin hai
tumhari zid men mira e’tiraf ho jaa.e
Leave a Reply