teri bazm-e-tarab ki sarḳhushi kuchh aur kahti hai
mire mahaul ki sanjidgi kuchh aur kahti hai
faza-e-sham-e-mai-ḳhana abhi kuchh aur kahti hai
hamari shiddat-e-tishna-labi kuchh aur kahti hai
farozan to hai bam-e-zindagi fan ke charaghon se
magar ahd-e-hunar ki raushni kuchh aur kahti hai
tumhari chak-damani ba-fasl-e-gul baja yaaro
mazaq-e-ishq ki sha.istagi kuchh aur kahti hai
taqaza hai tumhari ḳhastagi ka tum Thahar jaao
hamari abla-pa.i abhi kuchh aur kahti hai
lahu rote hue go umr guzri hai mohabbat men
magar qisse ki rangini abhi kuchh aur kahti hai
ada-e-shoḳh jin ankhon men hoti thi takallum ki
ab un ankhon ki gahri ḳhamushi kuchh aur kahti hai
baja hai parda-dari-e-shikast-e-arzu ‘nazim’
tire lab ki magar phiki hansi kuchh aur kahti hai
Leave a Reply