raushni meri hua chahti hai
bas vo darvaza khula chahti hai
qatl hone se bacha chahti hai
meri tanha.i dua chahti hai
bel ziddi hai junun ki meri
vo lipaTne ko hava chahti hai
ghar ka darvaza kabhi khulta nahin
phir bhi dahliz diya chahti hai
meri taḳhliq ḳhafa hai mujh se
meri pahchan juda chahti hai
dil ye chahe ki main ruThun us se
ruuh kyuun zabt-e-ana chahti hai
kaash gulshan ne ye puchha hota
kaun sa phuul ‘saba’ chahti hai
Leave a Reply