Charkh Chinioti
ham jo mil baiThen to yak-jan bhi ho sakte hain
puure apne sabhi arman bhi ho sakte hain
tujh se is tarah pe aa pahuncha hai rishta apna
bin bula.e tire mehman bhi ho sakte hain
ham tire naam ki japte nahin maala hi faqat
ham tire naam pe qurban bhi ho sakte hain
dil men aane ki bhala aap ko davat main duun
ghar ke malik kabhi mehman bhi ho sakte hain
but-e-kafir ki parastish pe koi qaid nahin
pujne vaale musalman bhi ho sakte hain
be-ruḳhi tu ne bhi barti jo ḳhudaya un se
tujh se barham tire insan bhi ho sakte hain
aaj jo gardish-e-dauran ka uḌate hain mazaq
kal vahi log pareshan bhi ho sakte hain
tu jo samjhe mire armanon ki ahmiyyat ko
mere arman tire arman bhi ho sakte hain
jab ḳhata karte the us vaqt na socha ai ‘charḳh’
ham sar-e-hashr pasheman bhi ho sakte hain
Leave a Reply