ḳhud ko na ai bashar kabhi qismat pe chhoḌ tu
dariya ki tej dhaar ko himmat se moḌ tu
is zindagi ki raah men dushvariyan bhi hain
rahbar ka haath chhoḌ na rishton ko toḌ tu
duniya ki har bulandi ko hai tera intizar
ehsas-e-na-rasa.i ki gardan maroḌ tu
mehnat ke dam pe kya nahin kar sakta aadmi
apne lahu ka aḳhiri qatra nichoḌ tu
jo kuchh hai tere paas vahi kaam aa.ega
barish ki aas men kabhi maTki na phoḌ tu
man ki ḳhushi milegi tu ye nek kaam kar
TuuTe hue dilon ko kisi tarah jaḌe tu
do-gaz kafan hi ant men sab ka nasib hai
ab chhoḌ bhi ‘dinesh’ ye daulat ki hoḌ tu
Leave a Reply