Mana Ki Yahan Apni Shanasai Bhi Kam Hai

maana ki yahan apni shanasa.i bhi kam hai

par tere yahan rasm-e-pazira.i bhi kam hai

haan taaza gunahon ke liye dil bhi hai betab

aur pichhle gunahon ki saza paa.i bhi kam hai

kuchh kar-e-jahan jaan ko ziyada bhi lage hain

kuchh ab ke baras yaad tiri aa.i bhi kam hai

kuchh gham bhi mayassar hamen ab ke hain ziyada

kuchh ye ki masiha ki masiha.i bhi kam hai

kuchh zulm o sitam sahne ki aadat bhi hai ham ko

kuchh ye hai ki darbar men sunva.i bhi kam hai