Asif Jamal
sahra se bhi viran mira ghar hai ki nahin hai
is tarah se jiina bhi hunar hai ki nahin hai
ye duniya basa.i hai jo ik be-ḳhabari ki
is men kahin yadon ka guzar hai ki nahin hai
hai jism ke zindan men vahi ruuh ki fariyad
is karb-e-musalsal se mafar hai ki nahin hai
divar ke saa.e ne tumhen rok liya tha
ab himmat-e-ima-e-safar hai ki nahin hai
jis ke liye be-ḳhvab raha karti hain ankhen
vo aankh bhi ashufta magar hai ki nahin hai
ham shola-e-jan tez havaon se bacha kar
zinda hain magar us ko ḳhabar hai ki nahin hai
ab kaun raha hai jo hamen itni ḳhabar de
jo haal idhar hai vo udhar hai ki nahin hai
Leave a Reply