husn-e-ma.asum agar raz-e-nihan tak pahunche
gham ka me.aar ḳhuda jaane kahan tak pahunche
ishq men yuun to sabhi sud-o-ziyan tak pahunche
kam hain aise jo mire azm-e-javan tak pahunche
ham pahunchne ko to har vahm-o-guman tak pahunche
tum vahan ho ki nazar bhi na jahan tak pahunche
vo musibat jise duniya gham-e-dil kahti hai
main na rokun to ḳhuda jaane kahan tak pahunche
tum kahin ja ke chhupo da.avat-e-nazzara to do
phir ye maqdur-e-nazar hai ki jahan tak pahunche
hukm hai chahe gulistan ka gulistan jal jaa.e
haath lekin na koi barq-e-tapan tak pahunche
tum rah-e-ishq men lillah mira saath na do
silsila gham ka ḳhuda jaane kahan tak pahunche
uf vo nazren jo mohabbat ka bharam rakh na saken
haa.e vo kaif jo ehsas-e-garan tak pahunche
raz-e-ulfat main chhupata to huun lekin ‘arshad’
Dar hai ehsas ki talḳhi na zaban tak pahunche
Leave a Reply