Mahesh Chandra Naqsh
sach to ye hai ki tamannaon ki jaan hoti hai
vahi ik baat jo hairat men nihan hoti hai
haal kah dete hain nazuk se ishare akasr
kitni ḳhamosh nigahon ki zaban hoti hai
mere ehsas o tafakkur men sulagti hai jo aag
vahi mazlum ke ashkon men nihan hoti hai
haa.e vo vaqt ki jab un ki hasin ankhon se
ek pur-kaif tajalli si ayaan hoti hai
log kahte hain jise husn-e-ada ki shoḳhi
yahi rangin isharon ka bayan hoti hai
kitni pyari hai vo ma.asum tamanna ai dost
jo tazabzub ki fazaon men javan hoti hai
Leave a Reply