Poet
naam se tere jo raushan matla-e-divan hua
har varaq ḳhurshed ke manind nur-afshan hua
teri hi qudrat se paida hai zamin-o-asman
ḳhaak ka putla tajalli se tiri insan hua
tere abr-e-faiz se taaza hai bagh-e-ka.enat
kya gul-e-alam nasim-e-fazl se ḳhandan hua
qadr rakhta hai sulaiman se zyada mor bhi
jo gada darvaze ka tere hua sultan hua
yaad se teri dil-e-nashad apna shaad hai
zikr tera mere dard-e-fikr ka darman hua
sar-bulandi men bhi mujh ko faḳhr ki daulat mili
allah allah kis qadar mujh par tira ehsan hua
halqa-e-sahab-e-dilan men tera ‘ahqar’ naam hai
ye samajh le chaak tera nama-e-isyan hua
Leave a Reply