safar se pahle sarabon ka silsila rakh aa.e
har ek moḌ pe ashob ik naya rakh aa.e
kahan bhaTakti phiregi andheri galiyon men
ham ik charagh sar-e-kucha-e-hava rakh aa.e
tamam umr safar se gharaz rahi ham ko
har iḳhtitam pe ham ek ibtida rakh aa.e
bhaTak na jaa.e musafir koi hamare ba.ad
so rah-e-shauq men ham apne naqsh-e-pa rakh aa.e
ye be-sama.at o be-chehra basarat log
ye pattharon men kahan aap a.ina rakh aa.e
Leave a Reply