Jab Kabhi Dard Ke Maron Ki Taraf Dekhta Hun

jab kabhī dard ke māroñ kī taraf dekhtā huuñ

maiñ haqīqat meñ sitāroñ kī taraf dekhtā huuñ

Dūbtā huuñ to mujhe haath ka.ī milte haiñ

kitnī hasrat se kināroñ kī taraf dekhtā huuñ

chādareñ un ko mayassar haiñ magar mujh ko nahīñ

maiñ to sardī meñ mazāroñ kī taraf dekhtā huuñ

kyoñ ravānī liye aayā hai yahāñ par dariyā

fikr hotī hai savāroñ kī taraf dekhtā huuñ

ab mire ghar se kahāñ chāñd dikhā.ī degā

maiñ ye hasrat liye tāroñ kī taraf dekhtā huuñ

haañ musībat koī aa jaa.e achānak mujh par

to kahīñ bhī nahīñ yāroñ kī taraf dekhtā huuñ

Leave a Comment