Aankhon Ki Takrar Agar Ho Jae To

āñkhoñ kī takrār agar ho jaa.e to

dil par dil kā vaar agar ho jaa.e to

maiñ to us kī prem pujāran huuñ lekin

us ko mujh se pyaar agar ho jaa.e to

duniyā-dārī saarī dil kī badaulat hai

socho dil bīmār agar ho jaa.e to

darvāze ban jaate haiñ dīvāroñ meñ

darvāza dīvār agar ho jaa.e to

maanā apne hoñToñ ko sī loge tum

chehra hī aḳhbār agar ho jaa.e to

ghar se bāhar jā kar jashn manāoge

ghar meñ hī tyauhār agar ho jaa.e to

Leave a Comment