yak-ba-yak jaata raha dilbar jo ghar aaya hua
dauḌa dauḌa main phira galiyon men ghabraya hua
jaan kya jallad ki leve dobara hukm-e-qatl
munh se us zalim ne jo yakbar farmaya hua
hijr men us gul ke ye surat hamari ban ga.i
rang bhi hai zard aur chehra bhi murjhaya hua
ḳhana-e-dil se karen gham yaar ka kis tarah duur
dar se uThta hai muhassal koi biThlaya hua
kya ghazab TuuTe hai dekhen ashiqon ki jaan par
aaj kuchh ghusse men hai baiTha vo jhunjhlaya hua
yuun kiya barbad us gul ne dil-e-pazh-murda ko
phenk de hai phuul jaise koi kumlaya hua
‘muntazir’ ka ji jala de kyon na har ik baat men
hai vo zalim sho.ala-ḳhu ghairon ka bhaḌkaya hua
Leave a Reply