Yak-Ba-Yak Jata Raha Dilbar Jo Ghar Aaya Hua

yak-ba-yak jaatā rahā dilbar jo ghar aayā huā

dauḌā dauḌā maiñ phirā galiyoñ meñ ghabrāyā huā

jaan kyā jallād kī leve dobārā hukm-e-qatl

muñh se us zālim ne jo yakbār farmāyā huā

hijr meñ us gul ke ye sūrat hamārī ban ga.ī

rang bhī hai zard aur chehra bhī murjhāyā huā

ḳhāna-e-dil se kareñ ġham yaar kā kis tarah duur

dar se uThtā hai muhassal koī biThlāyā huā

kyā ġhazab TuuTe hai dekheñ āshiqoñ kī jaan par

aaj kuchh ġhusse meñ hai baiThā vo jhunjhlāyā huā

yuuñ kiyā barbād us gul ne dil-e-pazh-murda ko

pheñk de hai phuul jaise koī kumlāyā huā

‘muntazir’ kā jī jalā de kyoñ na har ik baat meñ

hai vo zālim sho.ala-ḳhū ġhairoñ kā bhaḌkāyā huā

Leave a Comment