bad-e-shimal chalne lagi ang ang men
lipTa hai kaun mujh se ye patjhaḌ ke rang men
ḳhvahish ke karobar se bachna muhal hai
utrega tu bhi saath mire is surang men
main andhiyon men haath bhi pakḌun tira to kya
ik shaḳh-e-be-siper huun havaon ki jang men
‘ranjha’ main ahd-e-nau ka qabilon men baT gaya
to ‘hir’ ban ke pi na saki zahr jhang men
garma sakin na chahaten tera kaThor jism
har ik jal ke bujh ga.i tasvir sang men
aage ‘musavvir’ aag aqab men hai ye sada
pichhe na muḌ ke dekhna is dasht-e-sang men
Leave a Reply