donon hain un ke hijr ka hasil liye hue
dil ko hai dard dard ko hai dil liye hue
dekha ḳhuda pe chhoḌ ke kashti ko naḳhuda
jaise ḳhud aa gaya koi sahil liye hue
dekho hamare sabr ki himmat na TuuT jaa.e
tum raat din satao magar dil liye hue
vo shab bhi yaad hai ki main pahuncha tha bazm men
aur tum uThe the raunaq-e-mahfil liye hue
apni zaruriyat hain apni zaruriyat
aana paḌa tumhen talab-e-dil liye hue
baiTha jo dil to chand dikha kar kaha ‘qamar’
vo samne charagh hai manzil liye hue
Leave a Reply