tasavvur ham ne jab tera kiya pesh-e-nazar paaya
tujhe dekha jidhar dekha tujhe paaya jidhar paaya
kahan ham ne na is dard-e-nihani ka asar paaya
yahan uTTha vahan chamka idhar aaya udhar paaya
pata us ne diya tera mila jo ishq men ḳhud gum
ḳhabar teri usi se paa.i jis ko be-ḳhabar paaya
dil-e-betab ke pahlu se jaate hi gaya sab kuchh
na pa.in siine men aa.hen na aahon men asar paaya
vo chashm-e-muntazir thi jis ko dekha aa ke va tum ne
vo naala tha hamara jis ko sote raat bhar paaya
main huun vo na-tavan pinhan raha ḳhud aankh se apni
hamesha aap ko gum surat-e-tar-e-nazar paaya
habib apna agar dekha to dagh-e-ishq ko dekha
tabib apna agar paaya to ik dard-e-jigar paaya
kya gum ham ne dil ko justuju men dagh-e-hasrat ki
kisi ko pa ke kho baiThe kisi ko DhunDh kar paaya
bahut se ashk-e-rangin ai ‘jalal’ is aankh se Tapke
magar be-rang hi dekha na kuchh rang-e-asar paaya
Leave a Reply