Shaz Tamkanat
kya qayamat hai ki ik shaḳhs ka ho bhi na sakun
zindagi kaun si daulat hai ki kho bhi na sakun
ghar se niklun to bhare shahr ke hangame hain
main vo majbur tiri yaad men ro bhi na sakun
din ke pahlu se laga rahta hai andesha-e-sham
sub.h ke ḳhauf se niind aa.e to so bhi na sakun
ḳhatm hota hi nahin silsila-e-mauj-e-sarab
paar utar bhi na sakun naav Dubo bhi na sakun
‘shaz’ ma.alum hua ijz-bayani kya hai
dil men vo aag hai lafzon men samo bhi na sakun
Leave a Reply