Wo Kahte Hain Ranjish Ki Baaten Bhula Den

vo kahte hain ranjish ki baten bhula den

mohabbat karen khush rahen muskura den

ghurur aur hamara ghurur-e-mohabbat

mah o mehr ko un ke dar par jhuka den

javani ho gar javedani to ya rab

tiri saada duniya ko jannat bana den

shab-e-vasl ki be-khudi chha rahi hai

kaho to sitaron ki shamen bujha den

baharen simat aaen khil jaaen kaliyan

jo ham tum chaman men kabhi muskura den

ibadat hai ik be-khudi se ibarat

haram ko mai-e-mushk-bu se basa den

vo aenge aaj ai bahar-e-mohabbat

sitaron ke bistar pe kaliyan bichha den

banata hai munh talkhi-e-mai se zahid

tujhe bagh-e-rizvan se kausar manga den

jinhen umr bhar yaad aana sikhaya

vo dil se tiri yaad kyunkar bhula den

tum afsana-e-qais kya puchhte ho

idhar aao ham tum ko laila bana den

ye be-dardiyan kab tak ai dard-e-ghurbat

buton ko phir arz-e-haram men basa den

vo sarmastiyan bakhsh ai rashk-e-shirin

ki khusru ko khvab-e-adam se jaga den

tire vasl ki be-khudi kah rahi hai

khudai to kya ham khuda ko bhula den

unhen apni surat pe yuun naaz kab tha

mire ishq-e-rusva ko ‘akhtar’ dua den

Leave a Comment