gulon ko chhu ke shamim-e-dua nahin aai
khula hua tha daricha saba nahin aai
hava-e-dasht abhi to junun ka mausam tha
kahan the ham tiri avaz-e-pa nahin aai
abhi sahifa-e-jan par raqam bhi kya hoga
abhi to yaad bhi be-sakhta nahin aai
ham itni duur kahan the ki phir palat na saken
savad-e-shahr se koi sada nahin aai
suna hai dil bhi nagar tha rasa basa bhi tha
jala to aanch bhi ahl-e-vafa nahin aai
na jaane qafile guzre ki hai qayam abhi
abhi charagh bujhane hava nahin aai
bas ek baar manaya tha jashn-e-mahrumi
phir is ke baad koi ibtila nahin aai
hatheliyon ke gulabon se khuun rista raha
magar vo shokhi-e-rang-e-hina nahin aai
ghayur dil se na mangi gai murad ‘ada’
barasne aap hi kaali ghata nahin aai
Leave a Reply