kya mila ham ko teri yaari men
rahe ab tak umid-vari men
haath gahra laga ku-e-qatil
zor-e-lazzat hai zakhm-e-kari men
dil jo be-khud hua saba laai
kis ki bu nighat-e-bahari men
tuk udhar dekh tu bhala ai chashm
faeda aisi ashk-bari men
chat laga dete hain mire aansu
silk-e-gauhar ke ab-dari men
ruuth kar us se main jo kal bhaga
na-gahan dil ki be-qarari men
aa liya us ne daud kar mujh ko
taak ke ochhal ek kyari men
yuun laga kahne bas divana na ban
paaon rakh apna hoshiyari men
kab talak main bhala rahun shab-o-roz
teri aisi mazaj-dari men
hai samaya hua jo ladka-pan
aap ki vaza pyari pyari men
apni bakri ka munh chidate vaqt
kya khush aati hai ye tumhari ”men”
banda-e-bu-turab hai ‘insha’
shak nahin us ki khaksari men
Leave a Reply