kaun sa main javaz duun surat-e-hal ke liye
dast-e-saḳhi men kuchh nahin dast-e-saval ke liye
apni tabahiyon pe bhi khul ke na ro sake kabhi
vaqt hi kab mila hamen ranj-o-malal ke liye
us se main is tarah mila jaise mujhe pata nahin
karta hai kaun sazishen mere zaval ke liye
tum bhi khinche khinche se the ham bhi bache bache rahe
donon hi zimmedar hain shishe men baal ke liye
phulon ko har ghaḌi rahi kanTon se ḳhuun ki talab
thoḌa surur ke liye thoḌa, jamal ke liye
ab ke baras ki fasl bhi pichhle lagan men ga.i
suud men faaqe rah ga.e ab ke bhi saal ke liye
kah do ye shahryar se dar-o-rasan saje rahen
zulm-o-sitam bhi shart hain jah-o-jalal ke liye
Leave a Reply