vus.at-e-chashm ko andoh-e-basarat likhkha
main ne ik vasl ko ik hijr ki halat likhkha
main ne parvaz likhi hadd-e-falak se aage
aur be-bal-o-pari ko bhi nihayat likhkha
main ne ḳhushbu ko likha dastaras-e-gum-shudagi
rang ko fasla rakhne ki ri.ayat likkha
husn-e-goya.i ko likhna tha likhi sargoshi
shor likhna tha so azar-e-sama.at likhkha
main ne ta.abir ko tahrir men aane na diya
ḳhvab likhte hue mohtaj-e-basharat likhkha
koi asan rifaqat nahin likkhi main ne
qurb ko jab bhi likha jazb-e-raqabat likhkha
itne daaon se guzar kar ye ḳhayal aata hai
‘azm’ kya tum ne kabhi harf-e-nadamat likhkha
Leave a Reply