vo dilavar jo siyah shab ke shikari nikle
vo bhi chaḌhte hue suraj ke pujari nikle
sab ke honTon pe mire ba.ad hain baten meri
mere dushman mire lafzon ke bhikari nikle
ik janaza uTha maqtal men ajab shaan ke saath
jaise saj kar kisi fateh ki savari nikle
ham ko har daur ki gardish ne salami di hai
ham vo patthar hain jo har daur men bhari nikle
aks koi ho ḳhad-o-ḳhal tumhare dekhun
bazm koi ho magar baat tumhari nikle
apne dushman se main be-vaj.h ḳhafa tha ‘mohsin’
mere qatil to mire apne havari nikle
Leave a Reply