Aab Ki Tasir Mein Hun Pyas Ki Shiddat Mein Hun

aab ki tasir men huun pyaas ki shiddat men huun

abr ka saaya huun lekin dasht ki vus.at men huun

yuun to apna lag raha hai jism ka ye ghar mujhe

ruuh lekin kah rahi hai dekh main ghurbat men huun

aur to apni ḳhabar hai sab mujhe is ke siva

kaun huun kyuun huun kahan huun aur kis halat men huun

yaad bhi aata nahin kuchh bhulta bhi kuchh nahin

ya bahut masruf huun main ya bahut fursat men huun

main hua bedar to har shaḳhs ye kahne laga

niind men huun ḳhvab men huun ya kisi ghaflat men huun

zindagi ne kya diya tha maut ne kya le liya

ḳhaak se paida hua tha ḳhaak ki sohbat men huun