Aap Ki Nazron Mein Shayad Is Liye Achchha Hun Main

Waliullah Wali

aap ki nazron men shayad is liye achchha huun main

dekhta sunta huun sab kuchh phir bhi chup rahta huun main

is liye mujh se ḳhafa rahti hai aksar ye zamin

asman ko sar pe le kar ghumta phirta huun main

ḳhaak men milna hi ashkon ka muqaddar hai magar

kya ye kam hai us ki palkon par abhi Thahra huun main

ḳhaar hi ko ho mubarak ḳhaar ki umr-e-daraz

gul-sifat huun bas javan hote hi mar jaata huun main

badalon ko shayad is ka koi andaza nahin

ain dariya men huun lekin kis qadar pyasa huun main

gham-zada dil ko sitam se duur rakhne ke liye

barha ḳhud apne hi dil par sitam Dhata huun main

kyuun vo mere samne aane se Darta hai ‘vali’

ḳhamushi fitrat hai meri ek a.ina huun main