Afeef Siraj
us ne kyuun sab se juda meri pazirai ki
maslahat-kosh thi har baat shanasai ki
zakhm-e-dil ham ne sajae to idhar bhi us ne
naz-o-andaz se jaari sitam-arai ki
jism tarsha hua sanche men dhala hai jaise
dast-e-azar ne qasam khaai ho sannai ki
aisa sairab kiya us ne ki khud tishna-labi
ik sanad ban gai tarikh men saqqai ki
shukr hai ai shab-e-hijran ki badi muddat par
ho gai dil se mulaqat bhi binai ki
shukriya tum ne bujhaya miri hasti ka charagh
tum saza-var nahin tum ne to achchhai ki
Leave a Reply