qimat nahin rakkhi qad-o-qamat nahin rakkha
ham ne to koi kar-e-siyasat nahin rakkha
ab mo.ajiza hone se raha tere badan se
ham ne bhi magar shauq-e-rifaqat nahin rakkha
khul kar mire baare men tiri raa.e nahin thi
tu ne hi gila hasb-e-rivayat nahin rakkha
ankhon ki tarah chhat bhi Tapakti rahi shab bhar
barish ne mira ghar bhi salamat nahin rakkha
kis ne hamen avargi-e-shahr ata ki
kis ne hamen masruf-e-ibadat nahin rakkha
ab ḳhuun pasine ki kama.i nahin milti
kyon rizq mira hasb-e-liyaqat nahin rakkha
Leave a Reply