tha miri jast pe dariya baḌi hairani men
kyuun mira aks bahut der raha paani men
shayad is ḳhaak se ḳhurshid koi uTThega
so main rahta huun anasir ki nigahbani men
pas-e-adab ki yaan der nahin lagti hai
mir-e-zindan ko badalte hue zindani men
un ki avaz ko ḳhatir men na laane vaalo
tum ne dariyaon ko dekha nahin tughyani men
vo ajab daur-e-mohabbat tha zamana tha na vaqt
jaise donon hon kisi alam-e-la-fani men
vo bhi tasvir sa aghaz-e-mohabbat men raha
main bhi tha a.ina-ḳhanon ki si hairani men
koi gham-ḳhvar nazar aa.e to Dar jaata huun
ye bhi aaseb na ho qalab-e-insani men
mere honTon hi pe uḌti rahi avaz ki raakh
kaise lau de ye kisi ḳhitt-e-barfani men
teri basti ko ḳhuda ishq se abad rakhe
jis ne abad rakha hai mujhe virani men
Leave a Reply